قومي يالا

بقلم : كاميليا كامل (غادة الكاميليا )

قومي يالا
البسى الماسك الملون
واخفى كل التجعيدات
يعنى مش مسموح ف بكره
تعزفي لحنك آهات
وإطلقى الضحك المشرنق
واطلبى غزل البنات
واغرفى من كل ضحكه
نخب واملى به الكاسات
حتى لو فيه ضحكة باهته
وإن طعم النخب كدبه

بس ممكن تبلعيها
شرّبينى غصب عنى
وابلعيها من سُكات
وارسمى لى احلي صُدفه
واقطفى م النجم شال
وافرشى به احلى طاولة

خلّى عقل الليل يطير
من سنا عين المحاولة
وافردى شعرى الحرير
واطلبى نسمع كمان
لوّنى ضحك الفراولة
واعزمينى ع الخيال
وادعى كل السهرانين
والشموع ملهاش مجال

عينى مش حابة الدموع
حابه كنّى ف احتفال
نفسى اعيش لى حتي مرة
وانسى انى عشت كدبة
وانى عيشانى احتمال